民生經濟搞唔掂，向來是各國示威、暴亂的源頭；歐美等國的「佔領」行動，主因也是貧富懸殊，「搵唔到食」走出街頭，老朽可以理解；然而，香港的「佔領」行動，卻係要搞到令人搵唔到食，加上無良政客在議事堂推波助瀾，要求不知所謂嘅「國際標準選行政長官」，香港納稅人白養一班廢柴議員，認真攞命！
有論者指立法會開會對香港也沒有甚麼影響，這話一語中的，一如本報「正論」所指出，民意機關政治掛帥，沒人關心經濟民生問題，甚至反過來成為經濟民生議題的攔路石，這不是自甘墮落嗎？香港究竟要走向何方？
有一班政治狂熱卻幼稚不堪嘅反對派議員，「立法會」只能淪為「垃圾會」，「開會」叫囂鬧事掟嘢多過「議事」，即使開口都係「夾着脷」，老愛站在道德高地指指點點，把香港警察使用催淚煙這個國際認可控制人群衝擊警方的常規裝備，反對派議員卻視之為核彈攻擊那樣可怕，難怪令論者覺得尊貴議員們嘅思想未能追上國際潮流。
講真，香港有一大班反智嘅政客，香港唔沉淪就有鬼喇！「佔中三子」之一嘅戴耀廷，其概念據云是要用「愛與和平」，希望透過佔領中環要道，癱瘓特區嘅政經中心，而迫使北京改變立場。唔該擘大雙眼，睇吓今時今日嘅中國，經濟起飛，去到邊威到邊，香港佔中國整體經濟嘅比重已由回歸前嘅兩成五，跌至今時今日不足百分之三。「佔中」攪亂香港嘅經濟民生，動不了北京分毫。
「佔中三子」分不清「一國兩制」、「魚和水」的關係，香港是魚，北京是水，魚離開水活不成，而水離開魚依然是水，佔中運動，老朽從一開始就看不到希望，你哋「自首」都要搞嘢，又話要打破同一時間最多人自首的世界紀錄！慳啲喇，丟架丟到世界紀錄，仲要認屎認屁！