政情：拍拖撐枱腳 曾鈺成愁爆

佔領行動充滿變數，政壇為此都非常頭痕，立法會主席曾鈺成亦唔例外。尋日中午十二點幾，曾鈺成同太太喺中環置地廣場一間餐廳食晏，原本撐枱腳好浪漫，但係曾鈺成就一直愁眉不展，不時低頭沉思，又拎咗部手機出嚟篤咗一段時間，成餐飯同太太都冇乜兩句，唔知咩事咁煩惱呢？好彩曾太都有部平板電腦可以玩吓，唔係就畀佢悶親喇！