政情：衡仔唱反調 落田少面？

張：稅款已支持警運作

衡仔話，由前晚開始就收到多位朋友及網友問佢會唔會跟隨黨內發起嘅募捐行動，但佢費事逐一回應，於是索性喺網上公開表態。衡仔解釋唔捐款撐警嘅原因係，警方運作資金一向由稅款支付，冇消息傳出警方資金緊絀。至於涉嫌干犯香港法例嘅警察，都有法律援助嘅權利及保護，再加上捐款嘅用途不明，基於以上三個原因，所以佢唔會參加或者邀請身邊朋友捐款，但會尊重黨友嘅選擇。

我哋問過衡仔，佢再解釋話警察係受薪工作，依家又唔係因公殉職，睇唔到有幫助嘅必要，寧願幫青年人或者地震傷者好過。

不過咁公開同黨嘅決策背道而馳，會唔會同黨面左左？衡仔就話，佢已經唔係第一次同黨嘅意見有別，早前該黨發起反佔中簽名運動時，佢都直接表明拒絕參與，所以冇乜嘢大問題喎！而且佢支持「和而不同」，黨內若有唔同意見咪傾掂佢囉！佢仲有感而發話，不過社會依家連傾都冇得傾。

田：唔擔心日後面左左

自由黨黨魁田北俊（田少）就話，黨友可以有個人立場，唔一定要支持黨嘅決定，唔擔心日後大家見面會面左左。田少仲話，佢哋講到明係支持前線警員執法，對現時警民衝突感到痛心，所以佢會以個人名義捐出三十萬元，希望善款愈多愈好喎。