中環出更：登記選民跌 教育紡織界重災
二○一四年選民登記運動結束，選舉事務處尋日向立法會政制事務委員會交代最新選民登記數字，發現俗稱「超級區議會」嘅區議會（第二）功能界別登記選民數目增至三百二十五萬，相反廿八個傳統功能界別登記選民不升反跌，只有廿三萬二千七百人，比往年下跌五千三百人，而重災區係教育界、紡織及製衣界等多個界別，選民人數下跌數百至近二千人不等。
鍾國斌緊張 葉建源淡定
有心水清嘅政界中人分析業界登記選民下跌影響，首當其衝係前年先首次當選嘅紡織界議員鍾國斌（Felix），一如Felix自己舉例指，業界有一萬三千多名合資格選民，當中只有三千多人登記做選民，似乎Felix追問政府有無解決方法嘅同時，自己都要諗吓計，事關未來一、兩年選民數目繼續有減無增，Felix一旦競逐連任睇怕有得震無得瞓嘞！
至於同樣面對業界登記選民下跌嘅葉建源，相對就淡定得多，一來教育界一向係泛民天下，加上一如葉所言業界選民人數多，因此相信影響唔算好大。
卓妮