中環出更：嶺大選校長風波 陳智思難忘
嶺南大學（嶺大）尋日舉行學位頒授典禮，向多位名人頒發榮譽博士學位，包括恒隆地產董事總經理陳南祿（Philip）及著名文學家劉以鬯等人。除咗受頒榮銜嘅名人獲親友撐場極開心外，卓妮見嶺大校董會主席陳智思（Bernard）都一派輕鬆，事關今次係佢最後一次主持嶺大活動，今日將「畢業」卸下主席職位。細數喺校董會十五年光陰，Bernard話最大挑戰係前年嶺大遴選校長風波，令佢畢生難忘。
前年嶺大前校長陳玉樹辭職，被視為「梁粉」嘅鄭國漢獲委任為新校長，嶺大學生反應十分激烈，事件擾攘咗大半年。Bernard話，當時選校長花咗相當長時間處理，可以話係一個好好嘅經驗。雖然尋日畢業禮有學生以各種行動抗議，但Bernard認為學生今次想爭取嘅議題比選校長時更廣，冇影響活動進行，而且同前年有學生要求參與遴選校長事件相比，學生行為並不激進。校董會吸取前年嘅經驗後，面對依家嘅狀況就處理得好啲。
陳南祿再獲授博士銜
獲授榮譽工商管理學博士嘅Philip獲太太伍淑恩甜蜜撐場，Philip話，嶺大有個以佢外父、美心集團創辦人伍沾德命名嘅演講室，但係太太從未親身去過，所以難得尋日有機會，佢就帶埋太太一齊去參觀吓。今次係Philip事隔十年後再次獲授榮銜，問到佢哋會點樣慶祝，太太就笑笑口話，日日都同Philip慶祝喇。講起佔領行動獲好多學生支持，Philip話當年佢做學生時更激進，仲叫大家千祈唔好搵番佢七十年代喺港大啲學生相，講笑話唔透露自己做過乜，費事過咗招畀大家喎！
卓妮