伊波拉病毒攻城掠地，疫情失控，美國歐洲相繼淪陷，都咪話唔得人驚。香港話就話暫時冇人中招，但另一種病毒就流行緊，而且仲恐怖過伊波拉添！
冇錯嘞，功夫茶講緊嘅咪就係佔中病毒囉。已持續超過二十日嘅佔中行動，搞到七國咁亂，經濟損失慘重，市民冇啖好食，破壞力又點止伊波拉咁簡單吖。嗱，國際投行分析指出，佔中期間本港旅遊及個人消費每日損失超過一億元，飲食業更淪為重災區，總營業額累計損失超過九億元。而早前三大國際評級機構亦警告，若佔中持續，會考慮調低香港嘅主權評級添。
唔係講笑o架，話香港國際金融中心嘅招牌搖搖欲墜，一啲都冇誇張。正如有人預料，零售業可能要面對十年來最嚴峻嘅經濟寒冬，隨時慘過當年沙士襲港。以前好多商舖都會掛一副對聯：「生意興隆通四海，財源廣進達三江。」打開門口做生意，最緊要「通」同「達」，人流如鯽，貨如輪轉，想唔發達都幾難。家陣香港就啱啱相反，幾條主要幹道畀示威人士霸佔，路路不通，處處不達，你話點樣做生意吖？
好似一間位於示威區附近嘅酒樓咁，日市勉強可以保持六、七成生意，晚市就連一半生意都冇，賺賺埋埋都唔夠交租。有啲食肆仲慘，生意額急跌五成，要靠「割喉式」優惠吸客。業界人士估計，淨係中環、銅鑼灣同旺角三個佔領區，食肆營業額每日損失超過五千萬元，都咪話唔淒涼。
老闆欲哭無淚，打工仔更加飯碗難保。由於生意慘淡，有啲商戶惟有叫員工放無薪假，希望可以捱過難關。大家都知，好多打工仔手停口停，放無薪假咯喎，即係冇飯開咁解，問你點頂。
正所謂，一榮俱榮，一損俱損，佔領行動沒完沒了，受影響嘅又點止飲食業。好似十一黃金周咁吖，由於內地部分城市叫停訪港團，旅遊業首當其衝，搞到本地導遊冇啖好食，平均收入只有往年一成左右，部分新入行導遊焗住放假，一個仙收入都冇。零售業日子一樣難過，佔領區一帶店舖被迫落閘，數以千計員工受影響，只能食穀種。有經濟學者警告，如果佔領行動持續，隨時引發企業執笠潮，失業率勢必飆升。
所以話，佔領行動爭取民主係假，搞死香港至係真嘅。功夫茶諗極都唔明，香港本來好哋哋，點解有人偏偏要無事生非呢？佢哋究竟有乜目的呢？無論點都好，出嚟行遲早要還，佔中搞手及幕後黑手勾結外部勢力，禍港殃民，呢筆帳遲早要算，唔好放過呢班妖孽吖！