政情：不敵許Sir 跨部門記招摺埋

自從佔領運動喺上月底發起後，警方同消防處每日都開記者會，講解警方行動、道路阻塞情況及救護服務數據，輿論效果算唔錯，其中警察公共關係科總警司許鎮德（許Sir）更加走紅。

點知政府有樣學樣，幾日後由民政事務局副局長許曉暉牽頭，搞個跨部門記招交代佔領行動令民生受損嘅情況。可惜許曉暉人氣遠不及許Sir，最終喺尋日宣布記招「壽終正寢」。

話說許Sir開記招成日都有金句，好似「或者我再重申一次」、「I will now recap in English」等，一班網民就調侃佢，仲幫記招三人喺社交網站分別開設「四點鐘許Sir」、「（交通）李Sir馬路的事」及「（救護）梁Sir陪你談數據」專頁，就算有玩嘢成分，都算係有人氣。

不過，許曉暉帶同運輸署、醫管局及行政署等開嘅記招就有天壤之別，或者佢哋較謹慎，冇乜金句，輿論就少好多關注，每日出席嘅記者亦愈來愈少，呢幾日仲要開咗唔夠十五分鐘就收工，所以佢尋日無奈話「有需要會再重開」，就正式暫別各位喇。