政情：莊成鑫被封股市「燈神」
近期除咗香港股市因為受到佔領行動影響而下跌，就連全球嘅股市亦都呈現跌勢，相信令到一班股民都憂心忡忡。不過，對於香港中華出入口商會會長莊成鑫嚟講，心情就完全冇影響，皆因佢過往買親股票都跌，所以之後都冇再買喇。莊成鑫仲話，以前啲朋友仲成日講笑話如果佢買入或賣出股票時一定要通知大家，等大家有所準備咁話，直情當正佢係股市「燈神」。
雖然莊成鑫對買股票已經冇咩興趣，但對食大閘蟹似乎就好熱衷，閒閒哋一季食幾十隻大閘蟹都唔奇，好似去年就由九月開始食到今年一月，認真誇張。
嗜食大閘蟹
莫非佢唔擔心膽固醇過高影響健康？佢話今年佢食到第卅隻大閘蟹時去見醫生，發現膽固醇竟然無特別高到。佢估計，應該同佢每朝食大量蔬菜嘅習慣有關。不過，佢最後都係叫醫生開定啲降膽固醇藥「打定底」。
莊又話，佢食菜嘅習慣係源於一、兩年前醫生建議佢減肥，當時醫生叫佢食清淡啲，佢就駁嘴話自己應酬多，醫生就窒番佢話︰「早餐冇應酬喇啩！」佢先乖乖地朝早戒粥食青菜，終於減咗廿磅咁多。