立法會議員個人利益監察委員會（CMI）原本上個星期開會，調查五位泛民主派議員涉嫌收取壹傳媒老闆肥佬黎秘密捐款醜聞，但由於受佔領行動影響，本年度首次CMI會議要被迫取消。委員會原本想喺下周一開會，但又因為部分委員唔喺香港而要再次押後會議，最後左度右度下，委員會終於定喺本月廿八日召開閉門會議，調查呢單捐款醜聞。
CMI主席葉國謙透露，由於政治捐款醜聞已引起廣泛關注，委員會原本諗住愈早開會愈好，但當佢初步定出下周一呢個開會時間後，副主席劉慧卿（卿姐）就同佢講話要去瑞士日內瓦出席聯合國人權組織會議，講述香港嘅佔領行動及警方喺處理集會中嘅手法。
除咗卿姐唔得閒開會外，有委員又以當日有其他會要開為由要求另擇日子開會，最後只好再次將個閉門會議押後至月底舉行。不過，拖得一時、唔拖得一世，無論幾遲都好，只要CMI一開會，涉及政治捐款醜聞嘅議員將會避無可避，要面對立法會公平公正嘅調查。