政情：西九換管理層 冇預泛民？
西九文化區管理局○八年成立至今接近六年，唔少董事局成員都係「開荒牛」。由於政府委任公職有不成文「六六原則」，其中一項係同一人唔能夠擔任同一公職超過六年，所以最近傳出好多消息，話政府究竟應該將董事局一班「開荒牛」請離場，定係盡量少變動，都有好多懸念。政府尋日就刊登憲報，公布未來兩年委任，留同走嘅成員各半，但最值得關注就係唯一一個泛民主派代表退下後冇人接替，莫非泛民唔肯加入？
違「六六原則」 單仲偕拒續任
立法會議員單仲偕係西九董事局唯一泛民代表，我哋尋日問過佢，佢就解釋話，其實九月中民政事務局常任秘書長馮程淑儀（Betty）有搵過佢，問佢有冇興趣續任兩年董事。不過，佢話白鴿黨以往批評政府諮詢委員會唔應該違反「六六原則」，所以佢已被委任六年，冇理由帶頭唔遵守，所以婉拒邀請。咁點解唔搵其他泛民人士頂替單仲偕個位呢？
政府中人話，其實有考慮過幾個泛民人士，但呢個人既要所屬專業界別有代表性，又要有政黨背景支持，加上要對文化有所認識，最終都係揀唔落手。有政界中人就分析，話現時泛民全力參與佔領行動及發起不合作運動，近期唔少人仲陸續或打算集體辭去公職，就算搵到合適人選，話唔定風頭火勢，對方未必肯應承幫手。
名單欠一人 料當局後補
不過，有心人一睇張委任名單，發現離任有七人，但新委任卻只有六人，就係冇人頂替單仲偕個位，相信當局都係謀定而後動，之後再替補都唔遲。
講番其他委任人選，「三朝元老」發展委員會主席夏佳理、博物館委員會主席羅仲榮及表演藝術委員會主席盛智文全部有得留低，夏佳理仲做埋新設嘅副主席一職。工程界立法會議員盧偉國就頂替黨友林健鋒個位，其他仲有資深測量師溫文儀、鍾情藝術嘅新世界發展執董鄭志剛、畫家及雕塑家包陪麗、表演藝術家毛俊輝及知名設計師靳埭強。