中環出更：「千億新抱」父親弄孫為樂
俗語話「男怕入錯行，女怕嫁錯郎」，嫁畀恒基地產副主席李家誠嘅「千億新抱」徐子淇，婚後速添三名子女，家庭幸福美滿，咁就肯定嫁啱郎。早前身心美慈善基金（下稱基金）喺屯門舉行長者盆菜宴，任職金至尊珠寶副董事長嘅徐子淇父親徐傳順（Alex）都有到場，基金主席曾裕（Joyce）就忙於介紹契女兼基金總理彭濼錡（Cory）畀Alex識，叫Cory以徐子淇為努力目標，認真搞笑。
Alex講起囡囡就笑不攏嘴，佢話經常去探望徐子淇嘅三個BB，最細嘅BB仔話咁快已三歲幾。咁徐子淇仲追唔追第四個BB呢？Alex諗咗幾秒，笑笑口話唔知喎！Alex講起湊孫就勁開心，自爆佢嘅細女同樣已生咗三個BB，所以佢加加埋埋共有六個外孫，名副其實係子孫滿堂。
香港資源主席黃英豪（Kennedy）啱啱喺台灣返港，都趕到場支持。Kennedy話，台灣朋友好關心香港佔領行動，仲笑稱佔領同台灣早前發生嘅太陽花學運好相似。當時太陽花學運佔領立法院二十三日，香港佔領行動亦持續咗二十日，Kennedy希望政府同學生快啲傾掂數，唔好再虛耗落去。
曾裕搞盆菜宴饗老友記
講番盆菜宴，Joyce話舉辦目的係同區內長者同樂，所以趁秋涼擺番幾十圍請長者擦餐飽。佢自己飲食好清淡，無論盆菜幾好味，都係點到即止。講起早前有女子因抽脂送命，Joyce猛嘆不值。佢教路話，只要均衡飲食、適量運動再加上做減肥機，三管齊下一定瘦。
卓妮