港府成日畀人批評無所作為，旅遊景點來來去去都係嗰幾個，令遊客乏味，其實可能係有啲冤枉o架。嗱，香港日日上演「馬路噴泉」，有時仲好似水炮咁直射民宅添，呢啲咪就係香港獨有嘅景觀囉。
所謂「馬路噴泉」，係水務署嘅傑作，即係爆水管咁解。事關唔少水管嚴重老化，加上水務署維修不力，搞到水管爆完再爆，每年閒閒哋都有兩百至三百宗相關事故，造成大量資源浪費唔在講，最慘係民居被水浸，損失慘重。呢，西環山道一戶低層民宅就係受害者，舊年八月，一條有三十五年歷史嘅鹹水管疑因老化爆裂，鹹水直接沖入家宅，真係無妄之災。住戶回憶當時嘅慘況，鹹水浸到上大髀，家人被迫搬走，水退之後，全屋地板同傢俬浸晒，惟有請裝修師傅「大執」。
住戶本來諗住「劫後重生」，點知禍不單行，裝修期間屋外一條鹹水管又爆，部分電器同裝修工具被浸壞，髹咗油嘅牆身同鋪好嘅地下電線又報廢。冇計啦，全屋裝修焗住要打孖上，大拿拿唔見三十萬元，連埋酒店住宿同其他支出，四十萬元冇走雞，搞到戶主連棺材本都攞埋出嚟，七十歲人仲要打工，有苦自己知。
即係咁，一次爆水管當係天災，但二次爆水管就係人禍喇，你話水務署係咪害人不淺呀，係咪要負起責任呀，係咪應該賠償損失呀。最離譜嘅係，水務署官老爺居然闊佬懶理，苦主兩次爭取賠償，對方淨係一聲道歉，再加句「承諾跟進」就算數。苦主忍無可忍，惟有直接搵水務署長，對方呢次回覆好快，可惜純屬廢噏，話兩次爆水管，水務署職員已經盡快趕到現場搶修，事件唔涉及任何人為損失，住戶損失同佢哋無關，唔會賠償喎。住戶不服再要求解釋，對方睬你都多餘，話「再討論已冇意思」。
咁都得？搶修水管係水務署職責範圍，維修保養水管，及時更換，防止爆裂，更加係署方責任所在。如果唔係水務署失職，鹹水管點會失驚無神爆裂？住戶又點會蒙受咁大損失？家陣搞成咁，水務署居然卸膊，對受害人絕對唔公平。正如有區議員話齋，水務署態度似「爛仔」咯。
講開又講，水管老化已經成為老大難問題，呢頭爆完鹹水管，嗰頭就爆食水管，水漫香江其實一啲都唔浪漫，唔知幾多公帑見財化水。計功夫茶話齋，潮流興衡工量值，一於將水務官僚嘅人工同爆水管次數掛鈎，爆一次減一次人工，當作對受害市民嘅賠償，睇下佢哋仲會唔會闊佬懶理吖嗱！