中環出更：肥亨談佔領：心痛 擔心 憂心
商務及經濟發展局前局長馬時亨（肥亨）冇做官咁耐，仍對社會時事瞭如指掌，但佔領行動爆發以來，未見佢評論過，只係話在適當時候先再講。咁啱卓妮尋日在喺金鐘太古廣場撞到肥亨，唔知係咪因為鄰近佔領核心地區，肥亨終於開金口，仲以「心痛、擔心、憂心」表達對佔領行動嘅睇法。
恐小店執笠爆失業潮
肥亨解釋三個「心」嘅深層意義，佢話見到社會因佔領而撕裂，感到好心痛。佢又擔心佔領情況會惡化，唔知會否演變為流血事件。咁佢又憂心啲咩呢？「國家畀咗好大自由香港，依家搞成咁，國家會好失望，仲可能會收緊自由度添！」佢又話，佔領影響本港經濟，好多小店因為佔領冇晒生意，唔少仲執笠添，遲啲可能會爆發失業潮。
肥亨又借自己做例子，話早前約咗朋友在中環食飯，最後受佔領影響而取消咗訂枱。佢話，港島交通要道被人佔領堵塞，造成好大混亂，部分朋友因為咁而嚟唔到，相信好多人都感同身受咁話喎。講開交通，近期唔少人都因為佔領行動而改變咗搭車習慣，肥亨都唔例外，仲話「坐（私家）車都唔知要等到幾時！」
卓妮