中環出更：立會外示威者 鬧埋葉劉囡囡
佔領行動示威者持續包圍立法會大樓，唔少議員出入都要行經佔領區，有建制派議員除咗要兜路返立法會外，更被示威者「問候」。議員葉劉淑儀前晚離開立法會時就被十幾個示威者追罵，有人仲鬧埋佢個囡囡。葉太話，經過前晚一役後，佢每日都會帶埋把雨傘返立法會開會，見到示威者意圖向佢潑腐蝕性液體時，可以即刻開遮擋住，確保花容不受損害。
過去每逢立法會續會，主席曾鈺成都會請議員食早餐，但尋日嘅早餐差啲就送唔到去立法會。話說尋日朝早八點幾鐘，當三個餐廳職員將外賣送去立法會嗰陣，就遇上政府總部東翼前地關閉而過唔到立法會，職員惟有打電話搵救兵，隔咗陣先喺立法會職員帶領下兜路沿示威區行入立法會。
高佬賢要兜大圈返工
漁農界議員何俊賢（高佬賢）尋日本來諗住經海富中心天橋經政府總部方向行返立法會，但被堵路示威者拒絕放行，惟有掉頭轉行添馬公園過立法會。高佬賢話，雖然封路為佢帶來不便，但只要唔係日日都係咁，間唔中兜吓路都無乜所謂喎。
民政事務局常任秘書長馮程淑儀尋日返工時都被大批傳媒包圍，問政府有無評論過佔領行動幾時會結束，又問點睇特首取消立法會答問大會等，馮程淑儀就以「已經講過」為由不作評論，之後就微笑行入政府總部。
卓妮