老一輩人有句話︰未食過豬肉都見過豬行路。今時今日社會變遷，呢句說話掉番轉講就差唔多。唔係咩，日本和牛大家可能食唔少，但活生生嘅牛，大家又有幾多機會見到吖！
所以咯喎，大嶼山非常之受遊客歡迎，當地除咗有大佛同昂坪衫碌鈴，仲有三五成群嘅流浪牛，唔少人專程入嚟，就係為咗一睹佢哋嘅風采，連政府都用「人牛共和共處」嚟宣傳旅遊，話流浪牛已經成為大嶼山嘅親善大使，一啲都冇誇張o架。
可惜吖，作為大嶼山生招牌嘅牛牛們命途多舛，瀕臨絕種嘅邊緣。前年六月之嘛，八隻流浪牛喺長沙泳灘對出行人路，慘被高速駛過嘅車輛撞死，至今沉冤未雪不特止，幸存牛牛嘅安全環境亦毫無改善，本報記者去現場睇過，發現照舊係無遮無掩，連警示牌都冇個，悲劇分分鐘重演。
講到呢度，功夫茶覺得有必要為流浪牛「正名」。嗱，依家喺條街優哉游哉「散步」嘅牛，其實以前係幫農民耕田嘅，後來農業式微，農民咪將佢哋放生囉。甚至有人考證話，香港未有人類之前，已有牛類居住，所以話啫，與其叫佢哋「流浪牛」，不如叫「原居牛」更貼切。家陣呢班原居牛竟然畀人類新移民搞到雞毛鴨血，如果佢哋識講嘢，可能一早發動咗「驅蝗」行動咯。
查實要保障原居牛生命安全，話易唔易，話難唔難，睇吓當局上唔上心嘅啫。有保育人士向運輸署建議，喺事發路段加裝偵速攝影機以及減速提示路牌等，監察同限制車速，署方開頭係咁意敷衍吓，話會密切監察路面情況，後來連見面都嫌費事。有村民代表更加反映，從上世紀八十年代開始已經反映牛隻滋擾問題，並建議當局劃地養牛，作為景點開放畀遊客參觀，點知當局好似借咗聾耳陳隻耳咁，睬你都傻，卒之咪搞到牛有牛死，人有人煩囉。
嗱，早前有西貢居民投訴流浪牛滋擾，漁護署於是將牛隻遷移到大嶼山石壁監獄前嘅大草地。以為今次做番齣好戲啦，點知所謂「大草地」原來係寸草不生嘅荒野，結果牛牛四散搵食，有啲打食肆主意，有啲周圍摷垃圾桶，搞到附近居民不勝其擾。你哋話嘞，官老爺應做嘅唔做，唔應做嘅亂做，有咩法子唔出事吖。
功夫茶喺度真係要寫個「服」字。庸官胡混度日，得過且過，人類固然冇啖好食，樹木亦唔好得幾多，隨時死於非命，估唔到連牛牛一樣朝不保夕，你話係咪累人累物吖！