探射燈：一車違泊霸路 「玩死」單車賽
公路單車，無路可走？中國香港單車聯會本年度獲康文署資助，舉辦全港公路單車賽及全港公路繞圈賽兩項賽事，但開季的全港公路繞圈賽第一場比賽，已因元朗賽道上有違泊車輛而被迫取消，不設重賽，參賽者亦不可取回報名費。由於同一條賽道已連續三次發生同類事件，有單車選手指，除了封路安排欠妥善外，當區議員及居民常以阻礙居民出入為由反對舉辦賽事，即使將比賽時間調至周日清晨，仍然怨聲載道，慨嘆「踩單車踩到好似做賊咁」，香港若要培育出第二個黃金寶，恐難上加難。
中國香港單車聯會原定於九月七日舉行全港公路繞圈賽第一回合，為該會新一年度首項舉辦賽事，有關賽事共五回合。賽事定於早上七時開始，下午一時結束，賽道設於元朗工業邨，需要分階段封閉宏利街、福喜街、福欣街和福宏街。然而當天早上，所有單車選手和工作人員準備就緒之際，卻因場地內有違例停泊的貨車阻塞路面，令賽事無奈被取消。
不退款不重賽 車手無奈
「今次（喺元朗）已經係連續第三次取消喇！」有份帶領隊伍參加全港公路繞圈賽的形動單車隊車隊經理陳政烜大表失望，「呢類比賽正常名額二百個，今次都唔爆滿，因為好多人已經預咗會取消。今次我哋都係懷住丁點希望報名，點知都係搞唔成！」他指主辦單位與警方溝通不足，「大會一早已經申請咗封路，但點解冇人處理有車泊過夜嘅問題？比賽取消咗冇得退報名費，又唔會重新安排比賽，好多參賽者都覺得好無奈。」
中國香港單車聯會主辦的公路單車比賽，報名費最少一百五十元。賽事分成三十公里的公開組、十五公里的挑戰組，另有少年組、青少年組、女子組及元老組等，參賽者可參與多於一個組別，但需另行收費。陳政烜曾向聯會投訴，「搞三項鐵人都會封路，比賽之前喺唔同位置放路牌提醒司機，我提出過呢個方案，但情況未有改善。」
居民反對聲強 恐礙交通
陳透露，除了違例泊車問題外，舉辦同類單車比賽，經常遭當區人士反對，指會影響居民出入。元朗區議員張木林曾在區議會會議上批評封路會影響交通，「表演一個鐘，封路四個鐘，比賽三分鐘，其實封路時間可唔可以彈性啲、縮短啲？」另有地區人士抱怨，「特別住近流浮山嗰邊，封路對佢哋嘅海產出入有好大影響，如果啲海鮮死晒，搵邊個賠？」至於本年度共分八回合的全港公路單車賽，本月五日在東涌慶幸能順利舉行，令參賽者舒一口氣。
中國香港單車聯會為在香港發展單車運動的體育總會，康文署透過「體育資助計劃」向聯會提供年度資助，用作支付該會職員、辦事處和體育活動方面的開支。單車聯會於本年度共獲得七百四十六萬元資助，當中包括二十四萬元用作舉辦全港公路單車賽，以及十七萬元用作舉辦全港公路繞圈賽。
違泊影響安全 保險唔賠
「我哋已經做咗好多工夫，例如比賽前一晚派工作人員巡視，見到有違例車輛會盡量勸喻佢哋離去。」中國香港單車聯會主席梁鴻德解釋，路面上有違泊車輛屬偶發事件，當天已計劃延遲一小時開賽，但涉事車輛仍未駛離，惟有取消賽事。「有車泊喺路面，除咗阻住封路，仲會影響運動員安全，出事保險唔會賠，所以一定唔可以開賽。」梁稱一直有跟警方及地區人士溝通，希望申請封路時能獲較多配合，「我哋都唔想白白浪費晒啲錢。」
警方發言人表示，接獲有團體就九月七日在元朗橫洲工業邨舉行單車比賽的申請並予以批准。警方比賽前一晚上未發現有車輛在暫封路段上違泊，至翌日凌晨，三輛貨車被發現在該路段違例停泊，警方立即聯絡相關車主，駛走貨車，惟至早上仍未能聯絡到其中一輛貨車的車主，主辦團體因應現場路面情況決定取消該項賽事。警方已向該輛違例停泊的貨車發出定額罰款告票。
圖：關萬亨
文：林偉軒