政情：王賢訊着中山裝 被誤當侍應
出席正式嘅公開場合時，除咗可以着西裝，唔少人亦鍾意着中山裝，但唔一定係因為夠傳統，經常一身黑色中山裝現身嘅仁濟醫院副主席王賢訊（Vincent）就話，係貪中山裝夠晒方便，事關個衣領夠高的話，入面想着咩衫都得。佢自己就習慣裏面着一件T恤打底，一出席完活動就可以隨時「快速變裝」，想去其他咩場合都冇問題啦。
扣心口針作識別
不過我哋望真啲，見Vincent嘅中山裝上仲有一個黑色嘅心口針做裝飾，原來係有原因嘅。佢話雖然中山裝方便，但係亦試過因為咁，而發生過令佢尷尬嘅小插曲。
話說有次佢去到一個活動場地後，可能因為佢全身黑色衣着嘅關係，與場內侍應制服相似，有個香港小姐就誤認咗佢係服務生喇，仲走埋去問佢自己個座位喺邊度，問完之後見到佢個名牌先發現誤會咗。所以為免再被認錯，佢就諗到喺件外套上面扣番一個心口針，容易識別又大方好睇，以後買啲心口針仲可以同老婆輪流用添！