政情：佔中撕裂公僕
雖然各區嘅佔領行動有緩和迹象，但由於示威者堅持喺政府總部外集結，仲搞到政總三千個公務員一度要去後備辦公室返工，對政府運作造成一定影響。雖然公務員事務局局長鄧國威尋日繼續死撐話公務員士氣無受佔中影響，但據聞公務員團體內部已經因為呢件事而嚴重分化，唔少人漠視公務員政治中立規定戴黃絲帶返工，有人仲因為同辦公室同事因政見不同而反目成仇。
內部兩派對立
佔領行動除咗令一眾公務員返工麻煩咗外，公務員內部同整個社會一樣，因為佔中立場不同而分成兩派。較傳統嘅公務員由於恪守政治中立原則，平時喺辦公室已經少講政治，但新一批入職嘅公務員就因為年輕貼近佔中示威者而偏向支持佔中及同情示威者嘅處境，亦鍾意挑戰現有制度，變相搞到連政府內部都有支持佔中同反對佔中兩派人士。
該批年輕公務員不時用內部電郵、WhatsApp等社交媒體同同事分享佔中消息，遇有反對嘅聲音或者意見，佢哋更加會索性喺社交網站「取消交友」（unfriend），總之十足十依家社會嘅縮影。雖然唔少主管都對呢個情況心知肚明，但由於分化情況太過嚴重，佢哋都係私底下叫啲員工唔好再討論事件，都無去採取實質行動。
險攪亂歡送會
有資深公務員向我哋爆料話，之前喺一個為即將退休嘅二級行政主任（EO）舉行嘅歡送會上，有資深行政主任上台致詞時鬧爆學民思潮發起人黃之鋒，話佢喺出席十．一升旗禮時刻意背向旗杆兼大打交叉手勢，擺明係無視國家同一國兩制。台下唔少支持佔中嘅公務員聽到後即時議論紛紛，有人仲想企起身同該資深行政主任辯論，但礙於場合而唔敢出聲。
鄧國威尋日繼續向市民大派定心丸，話相信公務員會緊守崗位，繼續服務市民。被問到有政總員工戴黃絲帶返工有無違反公務員規定，鄧國威只係顧左右而言他，重申公務員要政治中立，所作所為唔可以影響工作，令人覺得有偏私。想問一聲局長，公務員戴黃絲帶返工，仲係唔係政治中立呢？不過有無影響就未知嘞。