中環出更：游大海「議員組」勁甩底
維港渡海泳賽事尋日再次喺維多利亞港上演，二千位游泳好手由鯉魚門三家村公眾碼頭出發，游去對岸鰂魚涌公園公眾碼頭，全程約一千五百米。大會邀請到署理政務司司長張建宗、新世界聯席發展總經理鄭志剛（Adrian）等人擔任主禮嘉賓主持起步禮。不過舊年報名參加渡海泳嘅五位立法會議員全部甩晒底無落水，剩番體文界馬逢國一個喺船上幫參加比賽嘅健兒打氣。
立法會一眾議員因唔同原因而無參加今年嘅渡海泳賽事，當中「立法會飛魚」紡織及製衣業界鍾國斌同金融界吳亮星就因公務無法出席。會計界梁繼昌就話自己原本報咗名參加公開組賽事，但因太多人報名而抽唔中，令佢非常失望。
馬逢國報名抽唔中
馬逢國本來都報名參加不設時限嘅悠游組，可惜一樣抽唔中，不過佢話自己近來太忙淨係練過一次水，所以都係留番出年再參加過。雖然無得落水，但馬逢國仍然坐足全場幫手頒獎，仲周圍幫人揸機影相，非常風騷。
繼一眾特區官員喺十．一搭船去灣仔金紫荊廣場出席升旗禮後，張建宗尋日亦特登由西灣河搭船去鰂魚涌為大會主持落水禮。張建宗原本淨係着住件黑色網球衫，但唔知船上係咪太大風，佢之後又着多件風褸。佢話自己平日好少游水，反而鍾意登高，喺山上面欣賞城市風光。
鄭志剛泳賽攞過獎
新世界聯席發展總經理鄭志剛（Adrian）就話自己雖然未試過游渡海泳，但當年都有參加學界泳賽，仲攞過獎牌。雖然Adrian都算係游泳健將，但佢就透露自己仲未有時間教兩個小朋友游水，話等佢哋大個啲先算喎。
信興集團副主席蒙德揚（David）話自己今年出任業餘游泳總會司庫一職，所日尋日專登黎幫手打點一切。佢話自己早兩年都有游過渡海泳，當年讀書時更試過打破水運會一百公尺紀錄。
除咗打理家族生意外，David都有為本港體育發展出力，早前帶咗一班運動好手去仁川出席亞運，下個月又會去日本福岡跑馬拉松。
卓妮