珍姐的收容中心位處一所破舊的鐵皮屋內，本是珍姐姑姐的居所，現時住有約三十隻狗及六十隻貓，全都是她的心肝寶貝。約八年前，珍姐接收第一隻流浪狗，「有一次我帶朋友入去，我朋友突然抽筋，我係咁叫救命，即刻叫救護車。」她發現一群平日受餵養的流浪狗突然從四方八面走出來，主動衝出馬路擋住其他車輛，直至救護車到場才散去，「我覺得佢哋好有性，真係好鍾意佢哋，所以就決定收養佢哋。」

散盡家財 餵飽「最愛」

珍姐用盡退休金、綜援及兒子的家用，更典當自己的財物，只為一班「我的最愛」的溫飽。惟她腦部患有粉瘤，打理收容中心甚為吃力，「真係好多謝阿Cat幫手。」

收容中心的流浪貓狗與義工相處甚歡。

義工們落力打掃收容中心。

「見到佢咁真心幫啲貓狗，我都係出少少力。」阿Cat去年在網上見到珍姐的收容中心收集物資，於是親身到狗場一探虛實。珍姐對流浪貓狗無怨無悔的付出，令阿Cat感動，她每兩個星期就會組織義工團到收容中心清潔，掃地、洗地、執垃圾，大家都抹着汗水、忍着蚊叮，分擔珍姐的重擔。

「除咗清潔吓，更加想多啲人知道有收容中心，可以捐物資，如果想養寵物可以領養。」阿Cat覺得收容中心的貓狗十分友善，並非大眾心目中般兇神惡煞，「我自己屋企隻貓都唔會咁嗲我，但呢度啲貓會嗲你摸佢。」阿Cat感嘆珍姐這類收容中心力量微弱，需要更多人的力量，照亮更多流浪貓狗的前路。

阿妹愛回家 兩拒被收養

為防貓狗互襲，通常牠們都困在籠中。珍姐走近其中一隻名叫「阿妹」的唐狗籠邊，阿妹不斷搖尾凝視珍姐，珍姐憶述，曾有街坊想收養一隻狗「看門口」，她便推介了「緊守崗位」的阿妹，豈料阿妹有天突然失蹤，四處尋找才發現牠就站在收容中心門口，「佢被人收養咗兩次，都趁人哋放佢去廁所就走返嚟。唔會再畀人啦！成日走返嚟！」

另一隻黃毛唐狗「妹豬」來到珍姐身邊撒嬌，珍姐邊摸牠邊「肉緊」地說：「佢好小器，見我摸其他狗多啲就會走埋嚟要我摸佢！」但提起妹豬的身世，珍姐就十分感嘆說：「嗰時佢被人打斷咗條尾龍骨，就咁擺咗喺（收容中心）出面。」珍姐及時帶妹豬看醫生，令妹豬後半身回復活動能力，但創傷卻令妹豬從此失去大小便的自控能力。看着如同子女般疼愛的貓狗，珍姐別無奢想，只想「帶得佢哋一日得一日」。

文：馬鳳玲

圖：崔祖佑

逢周日刊出

提名熱線:3600 9999

Fax:3600 9900

E-mail:like@on.cc