「斷人衣食，猶如殺人父母。」呢句話雖然有啲誇張，但的確代表好多市民嘅心聲。事實上，佔中霸道，阻人米路，搞到各行各業無啖好食，試問點會唔激起巨大民憤？點會唔觸發嚴重衝突吖？
講到佔中打擊生計，真係一殼眼淚。嗱，商務及經濟發展局局長蘇錦樑係咁講嘅，由於受到佔中影響，「十一」黃金周首兩日訪港內地旅客減少百分之一點七，其中個人遊旅客更暴跌百分之六點四，而且以上統計仲未計算多個內地省市暫停赴港旅行團嘅影響，你話係咪災情慘重吖。有工會控訴，佔領行動衝擊經濟，重災區遍布旅遊、百貨、酒店、飲食等行業，搞到業界蕭條，怨聲載道。好似導遊咁，由於「十一」煙花取消，廿多個內地團唔成行，導遊手停口停，「無工開，無飯食」。又好似零售業咁，估計有五十間金舖停業，千名售貨員生計受影響。酒店及餐飲業更加唔使講，位於「佔領區」嘅酒店入住率跌到得番五成，有酒樓更加試過成晚拍烏蠅添，業界呼籲示威者停止違法佔領，「畀條生路行吓」。
畀條生路行吓，呢句話簡直係普羅市民嘅心聲。老實講，政客搞抗爭唔係話唔得，大前提係唔可以破壞法治，亦唔可以影響民生，更加唔可以犧牲市民嘅自由同福祉，如果搞到人人無工開，個個無飯食，就算口號嗌得幾漂亮都係假。正所謂，民生係民主嘅基礎。佔中行動口口聲聲話「愛與和平」，開口埋口話爭取「真普選」，但係未達到目的，已經令到社會撕裂，經濟受損，市民蒙害，香港遲早玩完，就算爭取到所謂嘅民主，又有乜意義呢？香港經過百年滄桑，由小漁村變成大都會，靠嘅係市民刻苦拚搏，得來不易，佔中再唔收手，香港幾代人辛苦建立嘅基業隨時毀於一旦！
功夫茶唔係杞人憂天。有經濟學者指出，佔中爆發後兩日股市累計下跌七百四十五點，估計帳面財富已經蒸發七千多億元，即使將損失減半亦達三千五百億元，認真驚人。商會代表更加透露，有國際大型銀行原定下周在港舉行全體董事會晚宴，惟受佔中持續影響而被迫取消，對本港財經市場信譽造成嘅傷害難以估計。更加令人擔心嘅係，一旦中央閂水喉，對香港實施經濟制裁，到時真係悔恨已晚，一鋪清袋咯。
咁講喇，做人做事最緊要知所進退，佔中行動已經激起全港怒吼，反佔中行動不斷升溫，搞事政客同埋幕後黑手係時候收兵嘞。其實，幫人等如幫自己，畀條生路市民行，亦即係畀條退路自己行，否則嘅話，盞將自己逼上絕路嘅咋！