政情：赴北歐追「光」 郭家麒再敗走
近年愈來愈多人對北極光趨之若鶩，要在香港睇到北極光固然係不可能任務，但有啲國家鄰近北極圈就係比較常見嘅自然現象，要追「光」唔係咁遙不可及。不過，任務落喺立法會議員郭家麒身上就唔係咁講法，皆因佢年頭遠赴芬蘭追「光」失敗，原來上月再接再厲，飛到加拿大西北地區首府黃刀鎮（Yellowknife）碰碰運氣，點知都係敗北而回，認真掃興。
郭家麒笑言，原本諗住喺當地逗留四、五晚，應該點都睇到北極光，點知每晚唔係多雲就係落雨，結果喺黃刀鎮留足咁多晚都係食風居多，意外收穫反而係試坐水上飛機，同以「行家」身分到當地市議會參觀，但佢固然冇同當地市議員見面，避免給予人口實同勾結外國勢力。
郭家麒嘅字典裏面顯然沒有「放棄」呢兩個字，因為佢打算再向地球低緯度進發，誓要睇到北極光為止。