立法會「收爐」抖暑近三個月後鐵定周三復會，意味新一立法年度委員會將會重新洗牌。不過，立法會焦點除咗應對「佔領中環」行動，戰線將蔓延至財務委員會轄下工務小組委員會及人事編制小組委員會，皆因泛民主派飯盒會二十三名議員昨日突襲成功，全數加入兩個小組委員會兼政制事務委員會，豈料建制派聞唔到𤓓味，結果火燒後欄，失守工務小組同人事編制小組兩會嘅控制權。
根據目前最新戰況，工務小組有二十七名泛民議員加入，建制派得十九人；至於人事編制小組就更慘不忍睹，建制派只派出十四人迎戰二十六名泛民議員。
據知飯盒會上星期取得共識，一系列針對政改諮詢嘅不合作運動，除咗今次「搶灘」行動，齊人坐穩後仲會爭奪兩個委員會主席，重掌財政控制權。
按原本協調結果，其實會計界梁繼昌今年度已預咗接替葉劉淑儀出任人事編制小組主席，即係泛民唔爭已坐定粒六，由建制派操盤嘅工務小組，主席一職亦將成為泛民嘅囊中物。究竟係建制派危機意識低吖？抑或係懶懶行呢？