政情：泛民「佔領」立法會
「佔領中環」行動持續至第八日，唔少集會人士都捱更抵夜席地而睡，即係所謂「瞓街」。不過，一眾尊貴嘅泛民主派立法會議員又點會同「庶民」攬炒瞓街呢？繼我地接連踢爆有泛民議員濫用職權，長期借用立法會大樓十樓、七樓嘅會議室畀集會人士瞓覺外，據知有泛民議員仲借埋議員辦公室畀有需要嘅議員同義工休息添，唔知仲以為立法會兼營「善堂」或「劏房」。
集會者借會議室休息
我哋日前踢爆社民連立法會議員梁國雄（長毛）以「接見訪客」為名，長期借用立法會大樓十樓會議室，畀有需要嘅集會人士入內瞓覺或休息，其後連屬於建制派嘅七樓樓層都宣布「淪陷」，集會人士無孔不入咁借用會議室休息，有違反會議室使用守則之嫌，秘書處已表明會跟進事件，並勸喻有關議員要注意立法會嘅規定。不過，原來長毛濫用公帑只係冰山一角。
攰就瞓梳化「宿一宵」
據了解，除咗會議室呢啲公家地方，資訊科技界莫乃光（Charles）同會計界梁繼昌（Kenneth）都喺各自嘅議員辦公室放置咗梳化，原本只係方便自己平日做到攰就瞓梳化休息吓，但係近日除咗學聯、學民思潮同佔中三子朝七晚十一咁馬拉松式借用立法會大樓開會之外，泛民飯盒會都日以繼夜、夜以繼日咁樣密密開會應對佔中，開會開到攰仲會向Charles或Kenneth嘅議辦「借宿一宵」添！
Charles接受我哋查詢時坦白承認，有借出議辦梳化畀議員或佔中義工休息，佢解釋好多泛民議員同義工為應對佔中，連日都幾乎冇返過屋企，所以喺辦公室自設「劏房」，劏開個梳化位畀大家休息，唔會計較咁多。據知除咗Charles，Kenneth等幾位泛民議員都有梳化位提供，邊個入內休息無從得知。咁搞法，立法會大樓唔使示威者直接攻陷，依家已經逐步被「佔領」喇！