中環出更：無冷氣生活 星囡「耐熱軀體」
環境局局長黃錦星（星星）尋日出席一個有關出征亞馬遜森林嘅活動，唔知係咪因為無被問到「佔中」問題，所以笑到四萬咁口，同在場嘅中學生分享自己十幾年前去熱帶雨林視察嘅經歷。佢話因為旅行經歷，令佢好關注全球暖化，屋企個廳已有好多年無開過冷氣，呢種「慳」格仲感染埋自己個女，令對方由細到大都習慣無冷氣生活，鍊出「耐熱軀體」喎。
局長近期迷日本環保愛情片
星星分享完旅行經歷同環保生活，講得興起，佢又大爆近期迷咗一套日本嘅愛情電影，佢話套戲注入唔少環保元素，講述一個男高中生因為到森林學習環保，認識咗同是高中生嘅女主角，然後擦出愛火花。可能星星局長熱愛嘅只有環保，佢竟然不談愛情，反而話喺套戲入面了解咗好多有關環保森林運作嘅知識，仲叫在場中學生睇吓套戲，學會「惜物減廢」，真係對牛彈琴。
卓妮