中環出更：棄詩從畫 無邪源自《論語》
為咗推動水墨畫在香港發展，中國水墨大師系列展覽及研修班尋日起在饒宗頤文化館舉行，唔少熱愛文化嘅城中名人齊集開幕禮，包括享譽國際嘅水墨大師王無邪、國學大師饒宗頤細女饒清芬等人。卓妮趁機問原名「王松基」嘅王無邪，究竟佢個咁似武俠小說中人嘅名字，同佢有咩淵源？原來背後有一段古。
王無邪話，佢學畫之前原本想做詩人，所以就幫自己改名，取自《論語》嘅子曰：「詩三百，一言以蔽之，曰：思無邪。」無奈當年政治環境不利文字創作，佢嘅作品只能在香港發表，大陸及台灣都冇得入，所以後來索性師從水墨大師呂壽琨，轉向畫壇發展。結果王無邪糅合中西畫道精神嘅新水墨畫風自成一派，成為畫壇上不可多得嘅重量級人物。
許曉暉報名學畫
好少露面嘅饒清芬同丈夫鄧偉雄都拍拖到場，佢話小時候已開始習水墨畫及書法，饒宗頤親自教佢寫字，但係饒老好忙，唔得閒教佢繪畫，於是安排好友國畫大師彭襲明教佢。饒清芬話，老師教畫好注重基本功，頭兩年只係不斷學畫石頭喎！
民政事務局副局長許曉暉（Florence）亦有到場，佢話今次研修班邀請咗來自中、港、台、美國及新加坡各地十幾位知名水墨名師教授繪畫技法，學員包括唔少中小學老師，以便佢哋將作畫技巧傳授畀學生。Florence話，佢小時候亦學過繪畫，今次咁難得邀請到咁多名師開班授課，所以佢都唔執輸報名上堂。
卓妮