「學如逆水行舟，不進則退。」呢句話通常用嚟勉勵學生，不過今日應該送埋畀本地大學，繼續不思進取，自甘墮落，何止節節敗退，隨時輸到連影都冇吖。
嗱，本港大學嘅世界排名又輸畀主要競爭對手新加坡嘞。英國《泰晤士高等教育》公布本年度全球大學排行榜，作為本港旗艦學府嘅香港大學雖然保持第四十三位，但被今年上升一位至廿五位嘅新加坡國立大學進一步拋離，不進則退，而中文大學更勁跌二十名，問你死唔死。調查機構警告，港大作為香港最高學府，雖然暫時止住跌勢，但仍然停滯不前，反觀新加坡及南韓等其他亞洲大學不停追趕，後來居上，香港若然唔想落後於人，必須發掘內地嘅新科研經費及合作機遇咁話。
正所謂，當局者迷，旁觀者清。調查機構就講得啱嘞，近年本港教育水準每況愈下，大學嘅國際排名好似食咗瀉藥咁，跌到阿媽都唔認得，關鍵係乜呢？咪就係不思進取，自甘墮落囉。唔使講咁遠，就講近幾個月，不斷有國際大學排名調查顯示本港大學排名急速下滑，但社會上從來冇人關心，更加冇人提出點樣改善，香港自暴自棄，江河日下又怪得邊個呢。難怪有人話，如果教育成敗係一個城市興衰嘅指標，咁大學排名跌跌不休，就肯定係香港不斷沉淪嘅有力證明咯。
無計喇，周邊地區一心一意搞經濟，而香港就全神貫注搞政治，仲邊有人關心大學排名升定跌吖？睇吓街頭就知喇，困擾本港超過一年半嘅「佔中」鬧劇近日終於上演，而且演變成唔止「佔中」，而係「佔港」，搞到各區烽煙四起，七國咁亂，都唔知點收科。最匪夷所思嘅係，今次帶頭搞事嘅人，居然係飽讀詩書嘅教授同大學生，甚至連中學生都捲入漩渦，咁搞法，校園點可能平靜吖？學生點可能專心讀書吖？競爭力點可能唔輸畀人九條街吖？
不可不知，香港經濟本來已經處於衰退邊緣，家陣再承受佔中核彈嘅打擊，必定雪上加霜。整個社會畀呢場街頭顏色革命搞到雞毛鴨血，交通幹道癱瘓，中小學停課，商戶落閘，簡直係死城一樣。最慘係旅遊及零售業界，本來已經吊緊鹽水，依家再捱多一拳，真係想唔死都難。
各位莘莘學子，如果你哋真係想香港好，應該珍惜光陰，努力讀書，裝備自己。計功夫茶話齋，與其浪費青春佔領街頭，不如諗吓點樣為本港大學世界排名收復失地出一分力，咁咪仲實際，咁咪仲有意義，係咪？