政情：內會選副手 建制阻蘭

寧違協調機制「開戰」

本來喺每個新年度會期前，建制派同泛民代表會就各事務委員會嘅正副主席人選作出協調，但今年適逢佔中行動，泛民唔得閒坐低商討各事務委員會嘅正副主席人選安排，又講明會同建制派全面開火。既然泛民表明寸步不讓，加上今日就會選出內會同財會正副主席，建制派惟有自行周圍收風，睇下泛民究竟想點。

根據建制派同泛民之間嘅不成文規定，內會主席一向由建制派出任，泛民議員只可以出任副主席一職。阿Cyd本來喺兩年前已經表明想做內會副主席，但由於建制派一面倒反對，阿Cyd當時只好讓路，等兩年之後再算。可惜如今事隔兩年，阿Cyd仍然得唔到建制派信任，如果佢堅持出選內會副主席，建制派就會啟動後備方案，搵人提名陳健波做內會副主席。

雖然陳健波係建制派一分子，有違協議中內會副主席一職必須要由泛民議員出任嘅規定，但有建制派中人就話，既然泛民寧可搵阿Cyd出來選都唔肯換人，又話要同佢哋開戰，佢哋亦唔會咁容易就範。

泛民勢敗 終拒何出選

況且建制派議員多過泛民，如果最後真係要投票定輸贏，一定係泛民蝕底，所以尋晚泛民開完飯盒會後，就決定壯士斷臂，唔畀阿Cyd選內會副主席。

至於財會方面，由於建制派一早已經搵定由飲食界張宇人出選主席，加上劉慧卿（卿姐）之前講過今年未必會再爭主席一職，預計張宇人可以喺無對手之下自動當選。建制派話會按照規矩畀卿姐出任副主席，之但係如果阿Cyd走去選財會副主席，唔知建制派又會點樣應對呢？