中環出更:長毛疑帶示威者入立會瞓

佔領中環行動連日佔據政府總部同立法會大樓外嘅夏慤道同添美道,部分人士更加喺馬路上搭建帳篷或席地而睡,暫時未有撤退嘅迹象。為呼籲示威者繼續留守,社民連立法會議員梁國雄(長毛)除咗兩度下跪請求示威者唔好「鬆人」外,有知情人士仲投訴,懷疑長毛濫用立法會資源,容許示威人士進入立法會大樓瞓覺休息。

據了解,由於大批集會示威人士無覺好瞓,長毛連日就用「接見訪客」為由向秘書處借用立法會大樓十樓嘅會議室,等示威人士可以得閒入內抖抖。卓妮前兩日上立會十樓視察,發現大門被人用硬物阻住無法閂埋,會議室門口仲貼住張告示,上面寫有「義工休息區,內有人睡覺,請保持安靜」等字眼。

益自己人有前科

推門入去會議室望吓,發現內裏漆黑一片,隱若見到放有兩張帆布床,仲有疑似示威者瞓緊覺,長毛真係當正自己攞正牌畀人「屈蛇」。兩年前反對國民教育一役,長毛已經試過帶學民思潮成員上立會五樓沖涼,事後遭立法會行政管理委員會去信警告。如果今次長毛又濫用立會資源明益自己友,唔知行管會又會點處理呢?

卓妮

第一手消息請下載on.cc東網iPhone/iPad/Android/Windows Phone Apps