中環出更：社會撕裂 張俊勇嘆不值
由學生罷課演變到佔領中環行動已持續多日，持不同意見者形成兩派，壁壘分明，除咗喺街上互罵外，喺社交網站更掀起解除好友關係（Unfriend）風潮。早前香港傳藝中心喺灣仔君悅酒店舉行慈善晚宴，出席嘅中華總商會會董張俊勇（Thomas）大呻話，最近被相識廿幾年嘅朋友Unfriend，感到唔開心，覺得社會應該互相包容，唔好因此而撕裂。
Thomas係社團活躍分子，立場當然係反佔中，因此同唔少朋友意見有分歧。不過，佢亦係某網台嘅創辦人，明白要尊重言論自由，所以就算員工罷工，佢亦盡量保持中立。Thomas感慨話，若社會因未能互相尊重及包容而分裂，十分不值。呢頭呻完，Thomas諗諗吓決定落佔領區睇睇，了解後生仔嘅心態。
偕洪為民落佔領區了解
尋日凌晨大約兩點幾鐘，Thomas同香港菁英會前主席洪為民一齊去銅鑼灣及中環，期間同港大一名女學生傾過，同學仔話只係想爭取真普選，冇意要特首落台。Thomas趁機問佢認唔認同自己係中國人，女同學話認同，但去到外國就會強調自己係香港人。後來Thomas又同另一名理大女同學傾，女同學話出嚟目的係追求民主，承認因為冇讀過歷史，對中國並不熟悉。
聽完民意後，Thomas話個心舒服啲，因為唔係個個示威者都咁激進。洪為民就話，事件顯示有關方面要重新調整青年政策，要再做好啲。佢哋都讚示威現場井井有條。
卓妮