嘢唔可以亂食，藥唔可以亂用，同樣唔可以亂揼o架，一旦藥物入面嘅化學成分入咗人類食物鏈，分分鐘中咗招都唔知。唔係靠嚇，香港隨時可能好似坑渠油醜聞咁，成為藥餘污染嘅源頭。
唔講好多人都未必知，原來本港對藥物包裝容量完全零監管，冇任何法例規定藥物包裝嘅大小。換句話講，就算某隻藥消費者只會用一次半次，因為冇其他選擇，只能夠購買比所需劑量多幾十甚至過百倍嘅包裝，浪費金錢事小，對環境構成潛在威脅事大吖。
好似藥店出售嘅一般止痕藥膏或眼藥水，多數都係大包裝。問題係，好多人買呢類藥物只係為咗應急，症狀有所紓緩就會揼；亦有消費者習慣購買某啲藥物嚟「睇門口」，以備不時之需，使用一兩次，甚至從未用過，藥物好可能已經過咗期，又係變成藥餘垃圾，真係好大嘥㗎。
話時話，呢類情況其實相當普遍，本報前排做嘅調查發現，超過九成受訪者表示，屋企存有曾經用過嘅過期或者未過期藥膏、眼藥水同藥丸，其中四成人過去一年未用完整支藥膏就揼咗；三成人揼咗未用晒嘅眼藥水；大部分藥物都被揼落垃圾桶或者倒落廁盆，浪費情況相當嚴重。
據藥劑師講，藥膏或者眼藥水嘅化學成分，好似抗生素、類固醇、乙酰水楊酸咁，就算埋入土壤都唔會轉化，一旦滲入地下水，好可能會被生物接觸而進入食物鏈，化學成分最終可能透過受污染嘅「毒菜」、「毒魚」進入人體。仲有吖，亂揼藥物，會令病菌嘅抗藥性增加，意味着病菌會愈嚟愈惡，隨時變成藥石無靈嘅超級菌，問你驚未！
更加得人驚嘅係，內地近年不斷爆出「黑心藥」醜聞，有不法分子竟然將藥餘包裝成新藥出售，而本港亦周不時傳出有人大量收購二手藥。如果香港淪為「收藥黨」嘅基地，唔止會令神州同胞遭殃，港人亦隨時可能領嘢。
亂棄藥餘，後患無窮。其實問題唔係話冇解決嘅方法，只要藥廠生產多啲細包裝藥物，一來可以幫消費者慳錢，二來可以保護環境。另外，港府應檢討藥物包裝政策，並且喺社區藥房設立藥餘回收機制。台灣舊年已經落實藥餘回收，香港已經落後一步，官僚冇理由繼續翹埋雙手乜都唔做㗎。
一句講晒，回收藥餘、保護環境係當務之急，怕只怕港府官僚作風，多一事不如少一事嘅啫。計功夫茶話齋，如果當局連回收藥餘咁簡單嘅嘢都做唔到，不如回收番啲廢官先喇！