政情：大輝扭擰國斌焗接棒？
二○一六年立法會選舉未有耐先開波，但各政黨喺枱底下已經密密部署招攬同路人，或培訓第二梯隊接棒，好似自由黨立法會議員田北俊（田少）早已向外吹風玩埋今屆就退下火線，仲多次公開表示有意「欽點」工業界議員林大輝接收自己家當，可惜大輝對於係咪接棒仍在扭扭擰擰。眼見黨內僅餘有潛質接棒嘅第二梯隊又未成熟，最新繼任目標居然係紡織及製衣界鍾國斌（Felix）。
據悉大輝早已成為招攬對象，獲力邀出戰新界東直選，而且條件絕佳，仲連黨魁都有得做添，睇落條件相當吸引，可惜大輝呢隻草裙舞一跳就以年計，扭擰到依家都未決定到。究竟咩原因相信大輝自己最清楚，但搵佢過檔嘅人自然心急如焚，事關選舉需要部署，再拖嘅話就連議席都分分鐘冇埋，到時該黨嘅直選議席就真係一鋪清袋。
憂李梓敬未夠成熟
冇咗大輝呢個「即食」人選，該黨惟有放眼第二梯隊物色接班人，一眼就睇中網民話題人物、黨青年團主席李梓敬。李梓敬年輕、靚仔又出身中產，加上為咗宣揚經濟右翼理念，不惜瞓身為黨受靶，勇氣可嘉，絕對係黨內可造之材。不過，黨內有感李梓敬除咗係青年團主席，連區議會選舉都要等到明年先有得打，擔心佢未成熟就出去打立法會選舉呢場硬仗盞浪費彈藥，有意培養多幾年，等佢「大個仔」先再諗。
鍾形象唔錯又落力
所以該黨目前唯一希望就係放喺Felix身上，佢哋覺得Felix同樣年輕、中產，喺立法會浸咗兩年形象都唔錯，起碼講得兩嘴，亦好落力為中小企發聲，係下屆直選合適人選。
不過，據知Felix自覺喺功能界別坐得不知幾開心，若果一六年選舉規則冇變，大可以舒舒服服咁坐多屆，二○二○年先諗都未遲，所以要焗Felix上轎，似乎有難度，睇嚟要落啲工夫先至得嘞！