中環出更：佔中點收科 超乎發叔智慧
影響港九主要幹道嘅「佔領中環」行動持續多日，未受行動波及嘅新界鄉議局就一於少理，如期喺自己主場、沙田鄉議局大樓舉辦十．一酒會，多位高官開完行政會議後拉隊出席。佔中事發至今，統領新界鄉紳多年嘅發叔有冇妙計獻畀政府「收科」呢？發叔似乎想閂後門話，呢啲嘢唔輪到佢收科，仲話咁深奧嘅政治問題已「超乎咗我智慧」，解答唔到喎！
鄉局盼港重回正軌
副主席林偉強就話，鄉議局對佔中唔會袖手旁觀，希望佔中人士重回正軌，唔好影響第三者，要合法合情咁表達意見。講到唔會袖手旁觀，鄉紳係咪已經部署幫手呢？發叔話，佢哋新界人唔撐佔中亦唔反佔中，咁講等於當眾摑咗林偉強一巴，莫非只係林一廂情願想幫手？
不過，發叔其實私底下好識做，靜靜雞叫停原定昨日踩場請願嘅大蠔村村民，希望唔好喺風頭火勢下仲向政府落井下石。但林偉強上月拉埋村民到東涌大蠔河，出動挖土機剷除紅樹林都好激，鄉紳遲吓又會點收科呢？講到抗爭，其實新界鄉民先至係始祖，歷史記載佢哋早於一八九九年就曾武裝起義對抗英軍，發叔笑言當年應該好細個，唔知咁多嘢，但實情係佢未出世至啱。
卓妮