政情：媽媽叫改名 「阿文」變俊賢
漁農界立法會議員何俊賢（高佬賢）兩年前進身議會，礙於功能界別選舉，佢當選時知名度極低，市民對佢嘅認識亦不多。原來高佬賢「入行」前唔係叫何俊賢，本名係何文俊！
怕同學唔適應 埋名多年
高佬賢透露十五、六歲嗰年，母親幫佢哋三姊弟秤骨批命後，就想幫佢哋改名，高佬賢有感本名由父母賜予，媽媽要佢改名亦無不可，決定聽媽媽話，新朵取名「俊賢」。不過，當年高佬賢擔心忽然改名同學仔會唔適應，所以一直將「俊賢」埋名，直至英國大學畢業回港發展，先將「俊賢」公諸於世，仲改埋身份證中文名，依家得番屋企人叫佢乳名「阿文」。
對於我哋幫佢取花名「高佬賢」，佢笑言黨友通常反諷叫佢「矮仔」或簡單叫「高佬」，高佬賢仲自嘲知名度低，曾經有議員公開叫錯佢做「何俊仁」添！最近盛傳政府有意改組提名委員會，其中雄霸六十席嘅漁農界更係政府頭號「開刀」對象，唔知高佬賢會唔會考慮為漁農界秤吓骨，改番個牌頭趨吉避凶？