政情：蝦兵戰新西 泛民聽輸凸

郭家麒做極唔紅

上屆立法會新界西原本有八席，泛民取得五席，建制派就有三席。雖然今屆新界西增加到九席，但泛民反而因配票策略錯誤而搞到輸凸，當中白鴿黨李永達（高達）同陳樹英呢對「夫妻檔」仲因為互相搶票而雙雙落敗，反而公民黨郭家麒就因為有黨主席抬轎而成功當選。

不過，下屆選舉卻存在變數，各新界西泛民議員嘅去留就成為一大疑問。首先講郭家麒，雖然佢之前曾經做過醫學界功能界別議員，但由於佢為人不善搶議題出位，搞到做極都好似唔顯眼咁。眼見佢做足兩年立法會都無乜起色，區內知名度又唔高，再加上下屆可能無紅人幫佢助選，所以來屆能否返回立法會都係未知之數。

老嫩雙鴿冇起色

另一方面，高達來屆唔會繼續出選，改為派太太陳樹英同「乳鴿」尹兆堅出選，但兩人多年專注地區工作，唔係好識得處理政策議題，同高達相比依然差成一大截。雖然黨內近來銳意極速栽培兩人，大小議題都派出兩人攝鏡亮相，又搵尹兆堅負責處理泛民區議會協調工作，但兩人做足多時依然無乜起色，如果再唔發力，兩年後能否幫黨重奪議席都係一大疑問。

至於李卓人、梁耀忠同陳偉業三人，由於泛民講明會否決政改方案，如果不滿泛民做法嘅市民改為投票畀建制派，三人又能否保得住個議席呢？加上李卓人捲入政治捐款醜聞，想連任真係要問過選民喇！