中環出更：政總立立亂 白鴿高層歎茶
佔領中環行動尋日凌晨正式啟動，一批罷課學生同示威者一直留守在政府總部外，個個疲憊不堪。不過，有市民就發現民主黨（白鴿黨）幾個高層包括主席劉慧卿、何俊仁、單仲偕等人，晨早先到中環大會堂一間酒樓歎茶食中午飯，仲睇唔過眼，即場影低張相，上載到討論區同埋社交網站。
話說尋日中午時分，當一班學生正喺金鐘政總外暴曬、嗌破喉嚨之時，有市民就見到白鴿黨立法會議員劉慧卿、何俊仁、單仲偕、前主席楊森及林卓廷，竟然在大會堂一間酒樓度「印印腳」邊飲茶邊食點心。該市民激氣留言話：「唔使理佢，呢場運動唔需要乜嘢領袖」，又話「AV仁歎緊茶唔得閒理你啦」等。另外，有網民則將學生示威場面嘅相片同幾位議員飲茶嘅相拼埋一齊做對比。
甫入場即被帶走收工
一班老嫩鴿食飽飯之後，就負責帶啲音響器材進入政總範圍，但佢哋一去到就被警察攔截及阻止，交涉時就被警方以阻差辦公為由帶走咗。吓，咁咪即係一開始就可以收工？
卓妮