政情：藍爺爆「懷舊金句」保衞中環
近日「保普選反佔中大聯盟」聲勢好似平靜咗，原來只係換湯不換藥，尋日就有一個叫「保衛中環」嘅組織出嚟呼籲佔中三子要停一停、諗一諗，呢個組織仲搵埋好耐無蒲頭嘅民政事務局前局長藍鴻震（藍爺）到場坐鎮。藍爺一係唔講，一講就用番當年街知巷聞嘅金句來保衞中環，真係令人有時光倒流感覺。
「一切必須在控制之中」
藍爺當年退休前喺立法會為某條法案箍票不力，情緒激動下爆出金句「Everything under control（一切在控制之中）」，成為當時熱話。
事隔十幾年，藍爺尋日講到要保衞中環時，就突然將當年金句「升呢」，話中環係香港最核心地段，一定要「Everything must be under control」（一切必須在控制之中）。
近期政圈好似興復古咁，一批批舊人排住隊出來發言，先由前特首帶隊訪京、前教統局局長李國章批評佔中學生，現時連藍爺都要行出來，令港人一下子返回十幾年前嘅感覺。