政情：宗留新西雙陳枉爭
被譏為「老人俱樂部」嘅民建聯（民記）近年銳意換新血，可惜該黨部分元老戀棧權位，經常話退唔退，玩殘下面一班新人，繼該黨九龍東議員陳鑑林今屆「唔選又選」後，黨主席譚耀宗（譚Sir）又玩呢招。
陳勇新社聯背景招顧忌
話說早前傳出譚Sir做埋今屆就退位讓賢，由新界社團聯會理事長陳勇接棒，但惹來屯門區支部黨員不滿，反建議由屯門老牌區議員陳雲生出選。
早前傳出譚Sir會跟隨曾鈺成、陳鑑林等一眾元老，玩埋今屆全面引退，其中譚Sir喺新界西繼任人眾說紛紜，包括身兼黨副主席嘅陳勇及青年民建聯主席周浩鼎（Holden）等，其中尤以陳勇呼聲最高。雖然新社聯出身嘅陳勇近年極速上位，但始終新社聯票源集中元朗、北區，民記嘅屯門、荃灣等地區支部未必心甘情願撐佢。
加上隨着新社聯喺新界勢力日益壯大，其中新界西議員梁志祥同陳恒鑌都持有新社聯同民聯雙重身份，如果陳勇當選埋，新社聯風頭隨時蓋過民記，要民記靠邊站肯定唔制。至於譚Sir嘅愛將Holden，就因為該黨元老黃定光早已放風，有意提拔Holden接任進出口界功能界別議席，所以Holden接譚Sir棒似乎係流料居多，剩低只有陳勇一個選擇。
陳雲生靠屋邨難擔大旗
不過，有口痕友就爆料，話黨內屯門支部寧願推舉該區「大佬」陳雲生都唔肯益新社聯，第二梯隊亦可趁機上位。難怪陳雲生近期出奇咁積極，頻頻曝光。不過，陳雲生參選路難行，表面上單靠屯門幾條屋邨嘅選票就想更上一層樓，似乎有啲難度，除非該黨新界西總動員全力谷佢當選。
據知譚Sir經過綜合分析，與其推「雙陳」出去做炮灰自毀長城，寧願自己高票冧莊力保新界西三席，所以民記班細嘅搞完一大輪都係得個桔，睇怕第二、三梯隊上位之日遙遙無期，等完四年又四年。