中環出更：基金建跨境童服務之家
香港每日有成千上萬學童跨境返學，一旦掛八號風球，點樣安頓無法漏夜過境嘅學童或家長？身心美慈善基金（下稱基金）創會主席曾裕（Joyce）話，聽講現時係由校長或老師將學童帶返屋企照顧，但咁多學童又點容納得晒？所以基金最近新開設二千五百呎跨境服務之家，提供各類緊急支援。
早前基金舉行周年晚宴，一眾愛心爆棚嘅名人爭相捧場。Joyce話，基金推出嘅服務需緊貼社會需要，佢聽聞跨境兒童問題後，即刻搵地方設立中心提供暫時性嘅託兒服務，亦喺深圳南山區相應設立一個跨境服務之家，為因各種緊急情況而未能過境嘅跨境家庭解決燃眉之急。幸好今年颱風唔多，中心開幕至今仲未招呼過滯留嘅小朋友。
基金提供服務嘅大本營位於屯門，所以當晚好多屯門社區人士到場歡敍，包括屯門區議員林德亮。林德亮就勁呻話：「屯門區想要嘅嘢政府唔畀，屯門唔想要嘅嘢政府就夾硬塞過來。」講緊咩咁慘？原來佢講緊居民想要嘅屯荃鐵路被政府否決，但居民唔要嘅堆填區就夾硬要設喺屯門喎！
陳首銘呻飲食業「三高」
身兼基金總理嘅香港餐飲聯業協會主席陳首銘都有到場，講起最近嘅坑渠油風波，佢呻話係飲食業嘅一大考驗，希望事件快啲過去。不過，飲食業界仍受租金、人工及食材價格高企「三高」困擾，如果遲啲最低工資再加多兩蚊，到時仲難捱咁話。
卓妮