本報早前獨家報道，港府建議將立法會現有五大直選選區劃細做九個，民主黨議員胡志偉當日接受電子傳媒訪問時，即表示反對有關建議，但其實該黨曾向當局提議劃細選區，該黨前主席何俊仁當晚亦特意向傳媒澄清，話佢哋已經講咗杯葛政改第二輪諮詢，因此唔會評論有關建議，令人質疑該黨精神分裂。
原來呢個故事仲有下文，話說黨內亦有人覺得胡嘅講法同該黨立場有別，尤其係人都話劃細選區對該黨有利，冇理由倒自己米，因此喺某次內部會議中要求胡澄清。胡喺會上解釋，其實佢並非一刀切反對劃細選區，而係純粹反對「五變九」方案，認為若果選區劃太細，多個選區大幅減至只有三或五個議席，配票能力較高嘅建制派應可在有關選區取得過半數議席，對整體泛民不利，可惜電子傳媒最後只報道佢反對劃細選區，令人誤解。
黨友聽完後接受胡嘅解釋，但大家都覺得冇需要公開發稿澄清，結果令外人繼續以為胡亂噏廿四，甚至質疑該黨為反對而反對。佢下次講嘢真係要小心啲囉！