點解鬍鬚曾咁緊張呢樣嘢？皆因立法會十月復會在即，各界都估計泛民一開波就會發動全線拉布戰，以示不滿人大常委會對香港政改訂下嘅框架，最後隨時會影響到有關加強國際金融資料交換嘅立法建議。
鬍鬚曾解釋，為咗加強打擊跨國逃稅問題，經合組織早前公布咗最新嘅自動交換金融帳戶資料嘅標準，並要求香港等成員國及地區，喺二○一八年年底前完成相關工作。扣番要畀金融機構適應同落實新措施嘅時間，立法會須於一六年換屆前通過有關法案，時間相當緊迫，因此佢要為今次立法搶先向議員拉定票，希望泛民喺將來拉布時可以放佢一馬，以免連累香港符合唔到國際要求，甚至備受譴責。