政情：城壇轉場中大 阿伯減少
香港電台節目《城市論壇》向來係「維園阿伯」同激進泛民爭拗之地，不過尋日因為討論大專生罷課，節目專登轉場去中文大學百萬大道做節目。可能因為地點偏僻，維園阿伯中就只有長期觀眾文先生單拖到場，仲有份發言添。佢除咗對罷課有見解，原來仲同中大有淵源，皆因佢囝囝七年前喺中大歷史系畢業，難怪尋日好似返咗主場咁啦！
可能因為地方偏遠，尋日嘅觀眾比平日少，工作人員惟有陸續收櫈，相信唔想直播出街見到咁多空櫈。雖然人少咗，但係言論如常惹火，好似嘉賓之一嘅家長聯會會長李偲嫣就多次開火，質疑主持謝志峰點解論壇搬去中大，又話四位嘉賓中，只有佢一個旗幟鮮明反罷課，質疑佢揀嘉賓唔持平。
謝志峰就解釋，以往節目就住重要事件，好似正生書院搬遷、天水圍倫常慘劇，都會去到事發地點直播，唔係新嘢。佢又話如果唔持平，李偲嫣根本冇得坐喺度喎。