政情：「七成民意論」幫政改倒米

過去未曾達七成支持

香港喺九七回歸後經歷過兩次政改爭議，第一次係○五年嘅○七／○八年政改方案，該方案當年一度有成六成民意支持，但政府最後都搵唔到六名泛民議員轉軚支持，令方案遭到否決。另一次係一○年嘅二○一二年政改方案，該方案當年僅得五成多市民支持，從冇高過六成，但係就民主黨帶頭支持下獲得通過，反映市民支持度高低，同立法會尤其係泛民嘅投票意向，並冇必然關係。

至於今次嘅二○一七年特首普選方案，不論係坊間由政黨或學術機構做嘅調查，以至政府私下進行嘅民調，結果都係贊成「袋住先」嘅市民暫時居多。其中官方嘅民調顯示，對於人大常委會規定普選特首候選人必須取得提名委員會過半數支持、以及將候選人數目限制於二至三人，基本上都有超過五成市民支持，反對嘅大約有三成多至四成。

爭拗日激 料跌多升少

至於將提委會維持由千二人分四大界別組成，雖然支持嘅市民仍然稍多於反對，但比率就縮窄到只得四成幾對四成。官場中人預計，隨着政改爭拗愈演愈烈，罷課佔中輪流爆發，預計有關支持度只會跌多升少，要將「袋住先」民意攀升至七成根本不切實際。

另有官場中人更指出，就算港府啲宣傳攻勢奏效，到立法會表決前夕谷到有七成民意支持方案，要民主黨等溫和泛民「華麗轉身」，機會仍然不大，因為呢七成「袋住先」民意中，好可能有四至五成本身係建制派支持者，無論政改方案過定唔過，佢哋都唔會投票支持泛民；另外一至兩成則可能係沉默大多數，根本就唔會出嚟投票；最後會因溫和泛民轉軚而投票畀佢哋嘅，可能根本不足一成，不如繼續企硬反對，再同激進泛民爭奪反對「袋住先」嗰三成民意好過。總之喺今次人大框架一出，港府上下都已對政改原地踏步、未來管治舉步維艱有晒心理準備。