中環出更：蘇陳偉香 陳肇始「家己冷」似樣
仁濟醫院尋日喺沙田馬場舉辦仁濟盃賽，一眾董事局成員及嘉賓一早就到場，仲預備咗一個大蛋糕，為八至十月生日嘅總理慶祝，非常溫馨。期間卓妮見到仁濟主席蘇陳偉香和食物及衞生局副局長陳肇始傾得特別投契，望真啲，兩個人仲好似樣添！原來兩人係同鄉，唔怪得之特別啱嘴形。
講起二人笑容一致兼非常有姊妹相，蘇陳偉香就話已經唔係第一次有人咁同佢哋講，好似食物及衞生局局長高永文咁，就曾經話過佢哋似樣，加上佢哋二人都係潮汕人士，大家「家己冷」，輪廓有所相似及特別啱傾不出為奇。
職員出機狂按 蔡寶健唔禁
同場仲有仁濟總理陳李詠詩（Jenny）、身兼仁濟總理及BannerShop主席嘅蔡寶健（Anthony）。講起近期因為熱炒新出嘅智能手機，令一眾打工仔於上班期間為之瘋狂，Anthony就話佢當時開緊會，所以冇參與網上出機行動，但知道其他職員喺辦公室都按得好興奮，冇諗過阻止佢哋，笑言想阻止都阻止唔到，加上只係一段好短嘅時間啫。而Jenny雖然冇炒，但亦將於今日上台出部新機用，可能女士有手袋唔怕電話大部，但Anthony就話會買部細嘅，方便袋落袋。
至於副主席王賢訊（Vincent）最近就出咗本書，內容講及多隻被收養嘅動物，由於書名同七小福有關。有見及此，佢就打算喺十二月中嘅仁濟步行籌款中，發起與其他總理一齊着上特別服飾，扮演壽星公等七小福一齊步行，為活動增添歡樂氣氛，幫到人自己又開心。
卓妮