民陣召集人楊政賢（Johnson）近日既幫學聯向警方申請喺添馬公園舉行集會嘅不反對通知書，又要幫「佔領中環」十．一遊行申請不反對通知書，傳媒以至警方對佢哋嘅行動都非常關注，搞到佢日日都到收到無數個來電。Johnson近日就自爆，佢今個月電話已爆分鐘，依家每分鐘要收八毫子，單單四日就要畀成六百元電話費，真係幾誇張！
Johnson話，佢個電話月費係七十二元，用一千七百分鐘，點知今個月不停收發電話，搞到未到廿七號截數日，電話分鐘已經爆咗。我哋知道後都專登問打唔打電話畀佢好，定係用短訊聯絡，但佢就話呢個都算係佢為咗公民抗命而付出嘅「代價」。
咁點解唔用電話卡飛線，慳番啲錢呢？Johnson就坦言自己懶，所以冇做。
睇番佢之前已因為組織七一遊行被捕及被沒收手機，依家又打電話打到破財，睇嚟佢近排都幾唔妥。