政情：收錢李漢奸 歪理護肥佬黎
壹傳媒老闆黎智英向泛民主派人士秘密捐款，最終自作孽搞到被廉政公署調查，日前仲漏夜帶埋個仔搭飛機「着草」離港。同樣被揭發收咗肥佬黎三十萬元嘅民主黨創黨主席李柱銘（李漢奸），尋日就批評廉署調查特別針對泛民人士，處理佢哋嘅案件時特別快，手法亦都唔同喎。廉署一向有既定程序處理案件，李漢奸收咗肥佬黎錢仲滿口歪理來護主，難怪有廉署前高層寸爆比喻話：「差人捉賊，啲賊喺度講咩啫？」
辯稱代人收款 無憑據
肥佬黎日前去廉署接受調查兩個多小時後就漏夜離港，與佢同屬「搞事四人幫」成員嘅李漢奸尋日被記者追問對案件嘅睇法時，呢頭口口聲聲話唔評論廉署喺政改敏感時刻調查肥佬黎係唔係有政治目的，但嗰頭又喺度批評廉署調查特別針對泛民人士，又話廉署處理泛民嘅案件比其他案件都快，手法亦都唔同喎。其實李漢奸自己都有份收肥佬黎錢，雖然佢就聲稱係代人收錢，但一直無憑無據，講乜都得啦。
李漢奸嘅歪理就連廉署執行處前副處長徐家傑聽到後都話好激氣，話唔覺得廉署對呢單案件處理手法有咩特別，廉署都係掌握到證據就第一時間按程序處理，佢仲話︰「如果被人查緊，喺度話（評論）對方嘅手法係容許嘅，不過就好似喺度反擊咁囉，差人捉賊，啲賊喺度講咩啫？」佢仲批評李漢奸︰「廉署唔做嘢就話佢唔做，做又話白色恐怖、做得太快，道理喺邊？」呢番說話真係一針見血。
李卓人受查強顏歡笑
李漢奸就落力護主，但另一邊廂、因為被揭發收咗肥佬黎一百五十萬元而被廉署查緊嘅李卓人就封口唔評論事件。
前日我哋拍攝到佢心神恍惚咁，尋日佢就冇再周圍去喇，除咗落街去雜貨舖同喺附近茶餐廳食咗個早餐後，就一直留喺美孚新邨嘅寓所。對於記者嘅提問，佢都只係強顏歡笑咁話︰「我唔答喇，哈哈，我唔答喇，哈哈。」被廉署查緊仲嘻嘻哈哈，莫非強顏歡笑扮鎮定？