中環出更：梁福元護髮有道
元朗除咗老婆餅出名，十八鄉鄉事委員會主席梁福元嘅招牌「蛋糕頭」亦相當出位，好似早前卓妮就講過梁福元「找數」接受冰桶挑戰，佢個蛋糕頭淋完冰水後即刻彈番起亦得，得咗！卓妮日前傍晚時分行經元朗，就巧遇梁福元獨自泊車後，急急腳上咗座商廈。原來佢去髮型屋恤髮，仲自爆貪靚，定時定候都要搵御用髮型師恤髮，確保蛋糕頭長期堅挺，幾十年如一日。
邊恤髮邊睇東網節目
原來佢恤個靚髮，係想翌日同鄉紳參加福建高鐵團！佢坐定後就拎出手機狂，期間不忘分心用平板電腦收睇「on.cc東網」電視節目《房市知多少》，唔通佢想睇吓自己手持嘅丁屋升值多少？難得親眼見證梁福元恤髮，卓妮趁機推門入內同佢傾兩句。
梁福元笑言冇咩特別，皆因佢每隔四、五日就上去洗吓頭，每個月都補電一次，已經幫襯十年喇！對於「蛋糕頭」已經成為佢個人商標，梁福元笑稱早已習慣被揶揄係「僭建頭」、「鬆糕頭」，仲聽過有人話佢似麥當勞叔叔、卡通人物「爆炸狗」甚至愛因斯坦，「好似觸電嚇親咁」，但佢自言從冇隔夜仇，對呢類「封號」統統得啖笑，唔會放喺心喎。
每月補電 不煙不酒
洗頭後，髮型師只花約二十分鐘就完成剪吹部分，蛋糕頭即時重現，絕無欺場。咁點先確保「蛋糕頭」長期堅挺呢？梁福元坦言頭髮天生長得快兼好硬淨，加上平日唔煙唔酒，食條菜都要幫襯自家出品，所以即使年逾五十兼榮升爺爺，頭髮依然濃密。難怪本身光頭嘅政制及內地事務局局長譚志源早前到訪元朗區議會，都羨慕梁福元個頭「好靚仔」喇！
卓妮