民陣早前提出申請，想喺十月一日用維園草坪作為遊行集合地點，但尋日就收到康文署口頭通知不獲批准，解釋民政事務總署去年十二月已經申請咗喺維園六個足球場搞表演及展覽等活動，所以考慮到人流問題，唔批畀民陣。民陣召集人楊政賢知道被拒後就話感到匪夷所思，但有網民就話，民陣喺元旦同七．一已經租咗個維園啦，依家十．一仲要爭埋個維園？其實呢位網民計漏咗民陣十．一已借用咗金鐘添馬公園，搞到想睇煙花嘅市民冇咗個靚位，係咪呢啲先至叫做匪夷所思呢？
