政情：洪聖預警 漁農界選委等削？

反指削席激怒洪聖

我哋問過漁農界立法會代表何俊賢（高佬賢）有咩高見，但出身漁農世家嘅佢對呢座洪聖古廟似乎所知不多，以為兩支龍柱只係昔日建廟嘅支撐柱躉。「定海神針」龍柱突然倒塌，係咪預警漁農界六十個選委中，有十至二十個選委要喺下屆退位呢？高佬賢堅決唔認命，反指削減選委數目嘅消息震怒咗洪聖爺，先令龍柱倒塌發出警示喎！

目前選舉委員會由一千二百人組成，但漁農界選民就佔選委會足足六十席，選委仲多過商界、工業界，而漁農界選民實際上只係得一百五十九人，唔知仲以為連屋企養金魚嗰啲「漁民」都計埋。相反，坐擁逾六萬六千名選民嘅教育界只係得三十席，難怪漁農界一直係選委會改組嘅眾矢之的，人人磨刀霍霍爭住向佢哋嘅選委「開刀」。

何稱佔60席唔過分

對於有人以漁農業所佔本地生產總值（GDP）較低為由，要求削減選委數目，高佬賢就反駁，漁農界係唯一代表第一級生產行業嘅界別，議席亦只係佔選委會百分之五，一啲都唔過分。相反，同樣擁有六十席嘅宗教界GDP係零，社會福利界更加係負GDP，呢條數又點計呢？削減咗漁農界選委係咪加畀高GDP嘅金融界呢？

高佬賢重申，要確保香港柴米油鹽穩定，漁農界就要有足夠代表喺選委會發聲，而選委會分為四大界別，就係要體現均衡參與。咁講法，其實都唔使支「定海神針」倒塌嚟預警啦，香港人食粥食飯都要睇住漁農界，咁六十個選委點夠呀？點解唔反建議將宗教界同社會福利界嘅部分選委數目撥畀漁農界呢？