中環出更：政總飯堂生意差 貪曾冷眼無幫襯
自從政府總部由中環搬去金鐘添馬艦後，連帶一班公務員都感到「搵食」艱難，所以政府總部飯堂就成為佢哋嘅醫肚之地，但飯堂承辦商因為今年唔中標，所以做埋下周五就要結業撤離。本來食肆開業結業好平常，但我哋細問之下，先知道東主經營三年以來有成肚氣，老闆李先生仲諗番起「貪曾」前特首曾蔭權爵士在任以來都未去過幫襯，「證明特首有幾關顧夥計啦！」
下周五結業撤離
政總由一一年開始入伙，連帶飯堂同期開張。李先生話，當時佢哋係開荒牛，點知好景不常，年底就發現政總連同立法會爆發退伍軍人症病菌，慨嘆當時生意足足跌咗一半，曾經諗過摺埋，但最後都決定繼續經營。點知去到今年中入標，本月初產業署以「價高者得」通知佢唔中標，據知由經營多間警署飯堂嘅公司接手。
李先生諗起，退伍軍人症爆發期間生意唔好時，曾寫大字報控訴，點知貪曾喺門口望咗一望就走咗，至落任前都冇幫襯過，諷刺貪曾係「咁特別嘅特首」，相反財爺曾俊華事後就帶隊撐場。李先生笑言，今個月係經營以來生意最好嘅一個月，承諾會將最後一日營業額與員工分享喎。
卓妮